Monthly Archives

maggio 2017

20170530_140332
Ic Udine 1, Scuola dell'Infanzia Benedetti,

Musis matis

no comment

Creâ inte scuele de infanzie!

Metìn insieme la nestre fantasie par fâ nassî gnûfs amîs. Musis matis che nus fasin compagnie.
Une ativitât artistiche che e fâs lavorâ in grup ancje i frutins plui piçui.

MATERIÂL

  • un sfuei blanc par ogni frut
  • penarei
  • fantasie

ORGANIZAZION 

I fruts a son sentâts ator ator di une taule.

ATIVITÂT

La mestre e da ai fruts un sfuei parom.
Al “VIE!” ogni frut al dissegne il taront di une muse, in ce maniere che al vûl.
Cuant che ducj a ân finît a passin il lôr sfuei al compagn a diestre.
Cumò ogni frut al pues dissegna i vôi su la muse che il compagn i à dât.


Cuant che ducj a àn finît a passin, ancjemò une volte, il lôr sfuei al compagn a diestre.
Cussì si va indenant, dissegnant vôi, nâs, bocje, orelis, cjavei… 

 

Ae fin si podarà dâ un non a lis musis matis, e magari… contâ ancje la lôr storie!

 

 

IMG_0871
Ic Trasaghis, Scuola dell'Infanzia Osoppo,

Scufute Rosse (pantomime declamade)

no comment

Une flabe cognussude e devente teatrin declamât par vê une vere gjonde!

Intune cjase…. intal mieç di un bosc…. e viveve une biele frutute… e veve non Scufute Rosse.

– Scufute Rosse !! Scufute Rosse  Scu…fu…teeeee Roooosseeee!
– Ve ca che o soi!
– Cjape su chest zeut e va là da la none! Mi racomandi, no stâ lâ intal bosc… li dentri al è il lôf!
– Di sigûr mari, jo o fâs ce che tu mi disis!

E intal bosc…. une rose…. ve ca une altre…. ohhh ce maraveee e trê! Uuuuu cheste sì e cuatri…. ooohhhh … il lôf!

– Bundì, jo o soi scufute Rosse e o voi la de mê none…. mandi!

E rive li da la cjase de none.

– TOC  toc toc…. none… noneeeeee!
– Oh none… Ce orelis grandononis che tu âs… e ce nâs grant che tu âs…. e ce dincj grancj e luncs… e ce lenghe penze … e ce bocje grande grande grande GRANDONONE!
– Gnam gnam gnam…
– Ohhh ce mal di panze… o ai mangjade la none e Scufute…. ce MÂL…

Velu là che al è! Il cjaçadôr cul curtissat al taie la panze… po dopo a jessin la none e Scufute Rosse…
E dopo un clap… doi claps…trê claps… cuatri claps…. e po dopo si cûs.

– Ohh ce sêt, o voi a bevi…..
– Ohhhhhhh pluf…. gluc gluc gluc….

Il lôf al è muart… vive la none, vive Scufute… vive la mame!
… e cumò o ai capît: bisugne ubidî simpri la mame!!!

 

 

 

 

IMG_20170323_153146
Ic Udine 1, Scuola dell'Infanzia Benedetti,

Il timp

no comment

…ma ce isal il timp?

Te scuele de infanzie “Benedetti” di Udin i fruts a àn cirût di rispuindi a cheste domande une vore osteose!

Cemût fâ?

Sempliç! Une dì la mestre e à puartât ai fruts une scjatule plene di robe strambe: des semencis (vididulis, fasûi blancs e neris, gjirasoi), dai bulbis, un sac di tiere, dai vâs  retangolârs colorâts.

 

I arlêfs a àn tacât a prontâ la gnove cjase pes semencis des rosis e pai bulbis di Lili che a son deventâts dai gnûfs amîs di dismovi planc a planc sborfantju ogni dì.

 

 

 

 

 

Cul passâ dal timp lis semencis a àn tacât a menâ. Par ultin al è vignût fûr il Lili.

I fruts si son maraveâts une vore, par vie che a pensavin che lis semencis no si saressin mai sveadis. Cussì dì par dì a àn viodût cressi lis plantis e a àn capît l’efiet dal timp che al passe.

 

Ma cemût misurâ il timp che al passe cence orloi?

La uniche vie e je stade chê di meti dongje une meridiane di cjarte e capî cemût che il Soreli al segne lis oris e nus jude a viodi il passâ dal timp.

Ma il Soreli daspò de ploie nus fâs viodi ancje un biel Arc di Sant Marc!  

 

IL TIMP

Nui, ploie, soreli e vint
al cambie il timp
cu la ombrene  o voi fûr
e il Soreli al torne fûr.
Ma lis gotis di ploie planc a planc
si colorin pal Arc di Sant Marc
ma cuant che e jeve la fumate
no viôt plui la torate.
Ah se il timp mi scoltàs
dome i disarès
che jo o ai voie
di zuiâ intal aiar che al nûl di viole. (V.S.)

 

 

 

SAM_4073
Ic Faedis, Scuola Primaria di Faedis,

Un salt… te preistorie

no comment
Noaltris fruts des classis tiercis o vin imagjinât di fâ un salt indaûr tal timp… e o sin rivâts te PREISTORIE!!!
Il nestri viaç al è tacât fasint i archeolics, cuant che tal savalon dal zardin de scuele o vin cirût rescj antîcs…

Nus à plasût di studiâ la storie de evoluzion de Tiere: o vin fat tancj dissens e zuiât cu lis flash cards.

Finalmentri o sin rivâts ai DINOSAURS e li si sin divertîts a costruîju cu la cjarte di gjornâl…
un lavôr lunc, ma che nus à plasût une vore.

Cuant che o vin studiât i oms primitîfs, o vin ancje provât a sclesâ la piere
par fâ sù armis e imprescj par lavorâ la tiere. Ce fadie!

Par studiâ, nus à judât il librut in lenghe furlane “Preistorie in Friûl”, un cuader operatîf dal Consorzi Universitari dal Friûl.
Al è stât propit biel tornâ indaûr te storie in cheste maniere!
Cattura5a
Ic Tavagnacco, Scuola dell'Infanzia di Tavagnacco,

La storie dal puint dai fruts

no comment

CHEST AN O VIN SCOLTÂT LA STORIE DAL PUINT DAI FRUTS…

O VIN VIODÛT UNE RAPRESENTAZION TEATRÂL, O VIN PITURÂT E DISSEGNÂT LA STORIE E PAR LA FIESTE DI FIN DAL AN O FASARÌN VIODI AI NESTRIS GJENITÔRS CE CHE O VIN IMPARÂT….

 

 

“Al jere une volte un riul.

Un di une bande e un di che altre da la aghe a vivevin doi contadins.
… a jerin simpri malcontents …
… une dì a tachin a tirâsi i claps, un di ca e un di là, e i claps a colin ducj tal riul.

I fruts a levin a sentâsi dongje dal riul e si cjalavin cence podêsi cjacarâ.

“Se o podès lâ a zujâ di là…”
“Se o podès lâ a zujâ di là…” a pensavin i fruts.

Un biel dì tal riul, la aghe e tache a calâ e, un di ca e un di là, i fruts a saltin di un clap a chel altri e si cjatin tal mieç dal riul. Cussì a deventin amîs!

I paris e lis maris. …  finalmentri a decidin di fâ sù un puint, judâts dai fruts.

Un puint biel alt, come l’arc di Sant Marc, che dopo la ploie al torne a puartâ il soreli e la pâs.”

Foto 4 gjat ut e il floc di nef 3
Ic Tavagnacco, Scuola dell’Infanzia di Feletto,

Zuiant cun Gjat Ut

no comment

Noaltris fruts piçui de scuele de infanzie di Felet o vin cognossût GJAT UT e i siei amîs. Cun chest simpatic personaç o vin scoltât storiutis e rimarolis, ma soredut o vin zuiât, par imparâ cualchi robute su lis stagjons e cualchi peraule de lenghe furlane.

LA SIERADE

 Gjat Ut e lis pomis de sierade

 

 

 

  

L’INVIER

Gjat Ut e il floc di nef

 

 

 

 

 

Gjat Ut e il carnevâl

 

 

 

I vistîts di Invier

 

 

 

 

 

 

 

 

 

 

 

 

 

 

 

LA  VIERTE

 Gjat Ut e la piçule margaritute

Casar 6
Ic Faedis, Scuola Primaria di Povoletto,

Siencis par furlan

no comment

Chest an noaltris di tierce di Paulȇt o vin fat argoments di siencis par furlan. Chestis ativitȃts a son ladis daȗr dal progjet de scuele che al fevele dai animȃi.                                                             

O vin studiȃt la vacje

e imparât une cjançon!

INTE VECJE MASSARIE

Inte vecje massarie –  ie ie jo
e je une vacje blancje e nere – ie ie jo

e beghele  – mu mu mu
e fâs il lat – mu mu mu
e mangje blave – mu mu mu
e po dopo e rumie – ie ie jo …

Ce sorprese cuant che  un casâr al è vignût a scuele a mostrânus cemût che il lat al devente formadi! E ce mangjade!

IMG_0865
Ic Trasaghis, Scuola dell'Infanzia Osoppo,

La maraveose storie di une floridure blancje

no comment

Intal prât e je nassude une floridure blancje, cence un colôr ni un odôr… ma une pavee vignude di lontan i darà mût di cognossi la bielece di robis, di odôrs e di colôrs, e la sô vite e cambiarà…

 

Intal mieç di un biel prât florît e colorât e je nassûde une floridure pardabon stranie, cence un colôr ni un odôr…

Blancje come…. la nêf che e cole lizere su la piche di une mont… blancje come il lat dentri di une scudiele…. blancje come la sbrume di une onde dal mâr….

E steve li cjalant dut il biel ator di sè. E sintive il nulî di ducj i flôrs  ator di jê, e viodeve une schirie di animaluts che ducj  intrigâts si movevin intal  prât e intal cîl seren…

(chi i fruts mi contin ce che si môf intal ambient dal prât)

moscjis,âfs, zupets, furmiis di ogni sorte, gjespis e parfin cualchi mariute…

La flôr  po dopo di sei maraveade, un pôc avilide e jere restade, par vie che a nissun dulintôr i interessave di poiâsi sore di jê, nissun le considerave. Al è biel stâ un pôc di bessôi, ma po e ven la malinconie a sintisi bandonâts.

Dibot e rive sfladant une pavee dute colorade che si poie par câs propit sore di jê. E tire il flât a grops, parcè che e à svolât ator par dut  il borc tra cjasis, orts e stradis.

E sint la flôr blancje a sustâ e i dîs:

PAVEE: “Ce âstu che tu sês cussì avilide?”

FLÔR: “Ducj mi àn lassade di bessole!”

PAVEE: “Forsit parcè che no tu âs ni un colôr ni un odôr!”

FLÔR: “…e ce sono i colôrs e i odôrs?”

La pavee e scomence a contâ dut ce che e à imparât lant pal mont…

e tache dal colôr ROS….

ROS, come un pomodoro  biel madûr intal  ort, ROSSE come une cjariese suntun cjariesâr,….

(ogni arlêf, al conte par furlan disint cualchi robe che à chel colôr)

La flôr come par magjie e piture di chel colôr un dai siei pics, forsit par visâsi di chel che la pavee i sta insegnant e po dopo i conte dal colôr VERDULIN e dal ZÂL….

Planc a planc la flôr e devente simpri plui biele e colorade e, di odôrs a ‘nd à propit une schiriade!
Intal cîl e rive di lontan une niule  di ploie che iluminade di un rai di soreli e fâs comparî la bielece di un straordenari ARC DI SANT MARC.
La flôr cumò e je legre e in gjonde.

FLÔR: “Ce meracul, intal cîl e je une maravee biele come me!”

(Cheste conte nus insegne  a capî che a scoltâ si imparin cetantis robis e che a stâ di bessôi no si impare propit nuie!)

 

 

 

 

20170516_214950 (800x600)
Ic Trasaghis, Scuola primaria di Alesso,

Popul di Egjit

no comment

I arlêfs de classe cuarte de scuele Primarie di Dalès, insiemit cu lis lôr mestris, a àn inventât cheste poesie par furlan che si intitule “Popul di Egjit” dopo di vê studiât e aprofondît a lunc la Civiltât Egjiziane.

Dut al è nassût di un “compit di realtât”  proponût  ai fruts e che si è concludût cuntun fassicul dulà che a son stâts metûts adun dissens, elaborâts, poesiis creâts di lôr. In chest percors a son jentradis dutis lis dissiplinis e tra chestis ancje la lenghe furlane.

 

 

 

 

 

Popul di Egjit

Ce strani che al è il popul egjizian: si truche,
al met la cotulute e fintremai la paruche.
Il capo al jere il faraon
e di lui ducj a vevin une adorazion.
Al veve la cjase plene d’aur e d’arint
ma no si curave de biade int.
E ce dî dal contadin egjizian
che al preferive il paltan dal Nilo al ledan!
Il plui zovin al jere “tut”
e lui al adorave adiriture il “gjatut”.
Cul papîr a fasevin la cjarte
e a scrivevin, a decoravin cun vere art.
Chest popul lu vin studiât cun tante passion
e viodi il lavôr finâl nus à dât une grande
SODISFAZION.