Nô fruts e frutis di cuarte di Faedis o vin fat un viaç virtuâl ator pal Friûl a la scuvierte des bielecis dal teritori.
O sin partîts des Alps e, lant daûr dal percors dal Tiliment, o sin rivâts fin al mâr.
Il Friûl al è propit biel!!!
Browsing category
Scuola Primaria di Faedis
Lis plantis nestris amiis
Lis plantis a son intor di nô, nus dan ossigjen, di mangjâ, fen e granele pai nemâi. A coventin par vê la materie prime par fâ paste, pan, vueli, conservis, marmeladis, strucs di pomis, cjarte, len, medisinis e tantis altris robis che o doprin ogni dì.
Lis plantis a son nestris amiis, ma o vin scuvierzût che i arbui a son super amîs!
Nus fasin ombrene e fresc cuant che al è cjalt di Istât e nus tegnin cjalt cuant che al è frêt.
In primevere nus ispirin a sei artiscj cu lis lôr sfloriduris maraveosis e nus incjantin cu la musiche des lôr fueis e dai ucieluts.
Cuant che o zuìn nus dan ripâr par platâsi, bachetis magjichis e spadis par diventâ mâcs e cavalîrs.
Se o gjavìn la mascarine de muse, i arbui nus fasin sintî l’aiar net e profumât.
Savêso che i teis dal zardin de nestre scuele si lassin strenzi dai nestris braçuts e nus tegnin tante compagnie?
Chest an o vin esplorât il bosc, il zardin, il rocul e lis frazions di montagne dal nestri comun. Cussì o vin cognossût il noglâr, il cjariesâr, il cocolâr, il morâr, l’ulîf, l’orâr, il cjarpin neri e l’arbul di Gjude.
Par contâ il valôr des plantis o vin lavorât tal nestri ort de scuele, scusupât, semenât, costruît libruts, fat matematiche, dissegnât, piturât e scrit in ben trê lenghis: talian, inglês e furlan!
Un viaç intal mont de art
Chest an, nô di cuinte, o vin fat un biel viaç intal mont de art.
O vin cognossût MONET, VAN GOGH, MATISSE, KANDINSKY… e ju vin interpretâts a mût nestri.
O vin realizât ancje tancj dissens cun diviersis tecnichis.
Si sin une vore divertîts!
Tant che oms de Preistorie!
Chest an nô fruts di tierce de scuele primarie di Faedis o vin imparât a costruî argagns, imprescj e ogjets dal om primitîf. Intai laboratoris di archeologjie nô fruts o sin deventâts protagoniscj e no scoltadôrs passîfs intal aprendi la Preistorie.
Tai laboratoris che a àn metut adun la lenghe furlane, la lenghe taliane e la lenghe inglese o vin imparât a coltivâ i cjamps, a costruî lis armis par lâ a cjace, a costruî une cove, a tiessi la lane, a realizâ vâs e struments musicâi, a impiâ il fûc.
Ve ca cualchidune des nestris ativitâts
AGRICULTURE (cliche)
CJACE
L’om primitîf par difindisi e par podê mangjâ, dal imprin al à imparât a cjaçâ.
Tal PALEOLITIC il clime al jere une vore crût (glaciazion) e lis plantis a jerin pluitost raris.
I oms, che no cjatavin pomis e lidrîs di mangjâ, si impegnavin tal lâ a cjace.
A cjaçavin soredut insiemi, par podê cjapâ e copâ animâi di grandis dimensions, tant che il mammut.
Tal NEOLITIC il clime al jere cambiât e al jere deventât plui clip.
La Tiere e tornà a jessi cuvierte di une vegjetazion fisse.
L’om al scuvierzè la agriculture e l’arlevament, che a rivoluzionarin il so mût di vivi.
Cun dut achel, al continuà a impegnâsi tal lâ a cjace, inventant gnovis armis plui adatis al ambient.
LA PITTURA RUPESTRE (cliche)
WEAVING TESSITURA (cliche)
Esplorìn la Nature cui nestris sens
Ce isal di plui biel tal scuvierzi la Nature se no chel di esplorâle cun ducj i nestris sens?
Pai plui piçui de scuele primarie, i fruts di classe prime, la cognossince de nature e passe pes lôr manutis.
Mans che a cjapin sù fueis, a cjarecin rosutis, a semenin semençutis di ravanei e lidric, a specolin panolis, a sborzin jerbe, a traplantin pomodoros e patatis, a ravanin te tiere a cirî viers, a sticin mariutinis e a scjampin se e passe cualchi âf.
Tal nestri ort e zardin de scuele primarie di Faedis al è pussibil provâ a tocjâ pardabon tantis maraveis de Mari Nature. Par no cjacarâ dai profums des plantis aromatichis, dal odôr de cevole e dal puâr, dai peteçs dai uceluts e dai colôrs sflandorôs di paveutis, rosis e fueis di dutis lis speciis.
Come un vêr tesaur!
Savêso cetantis robis che o vin fat in furlan?
Nô di tierce o vin lavorât e studiât cul librut de Preistorie in Friûl e o vin fat ativitâts di leture e scriture e ancje ativitâts pratichis.
O vin realizât un strument musicâl, un piçul vâs e une tele fate cul telâr. Fâ chescj lavôrs nus à plasût une vore!
I nestri lavôrs a son stâts metûts dentri une scjatulute piturade
par puartâju a cjase propit COME UN VÊR TESAUR!
Gjinastiche par furlan!
Noaltris fruts e frutis di seconde de scuele primarie di Faedis chest an o vin fat gjinastiche par furlan.
O vin imparât a saltâ cu la cuarde, a saltâ indenant, indaûr, a drete e a çampe.
O vin coret, imitât il cjaminâ di tancj animai e o vin fat ancje tancj zûcs.
O vin imparât a zuiâ di “Patate bolinte”, di “Pistolero”, “Bale gjambar”, “Il semafar” …
Si sin divertîts une vore!!!
I nestris esperiments
Nô fruts e frutis des classis 5^A e 5^B de Scuele Primarie di Faedis, chest an o vin lavorât sui esperiments di siencis.
In particolâr o vin zuiât cu la AGHE, cul AIAR, cu la TIERE e cul FÛC.
O vin fat une vore di esperiments par osservâ cualchi fenomen che al sucêt inte nature.
Si sin divertîts un grum!
Ve ca cualchi nestri esperiment.
10 di Dicembar: zornade dai Dirits Umans
Lunis, ai 10 di Dicembar 2018, nô fruts de Scuele Primarie di Faedis, in colaborazion cu la Aministrazion Comunâl, o vin organizât une fogolade par ricuardâ i setante agns de Declarazion dai Dirits dal Om.
Noaltris di classe cuinte o vin fat un studi su la storie dai dirits umans, lant a ciri lis tapis che a àn puartât al document che o vin in dì di vuê. Par ogni tape o vin cirût di capî il dirit che al corispuindeve e o vin scrit une poesie.
O sin partîts tal 1786, cuant che tal Grant Ducât di Toscane, il Granduche al à abolît la pene di muart e, lant indevant tal timp, o sin rivâts fintremai al 2013 in Pakistan, cun Malala, che si è batude par la istruzion des feminis tal so paîs.
Ve ca la prime tape de nestre ricercje e des nestris riflessions.
1786, GRANT DUCÂT DI TOSCANE
Il 30 di Novembar il Granduche Pieri Leopolt al firme il gnûf codiç penâl e il Granducât di Toscane al devente il prin stât intal mont che al à abolide la pene di muart.
IL FÎL
NI PIERE NI CUARDE NI MANARIE
NI ALTRI IMPREST AL PUEDI COPÂTI,
ANCJE SE TU ÂS SBALIÂT UNE VORE
ANCJE SE CAMBIÂ E JE UNE SFIDE.
TU VARÀS DI SCONTÂ LA PENE
PE GRANDE PENE CHE TU ÂS DÂT
MA LA VITE DAL OM E JE UN FÎL
CHE NOL PUES JESSI TAIÂT.
IL FILO
NÈ PIETRA NÈ CORDA NÈ SCURE
NÉ ALTRO STRUMENTO TI UCCIDA,
ANCHE SE HAI MOLTO SBAGLIATO,
ANCHE SE CAMBIARE È UNA SFIDA.
DOVRAI SCONTARE LA PENA
PER LA PENA GRANDE CHE HAI DATO
MA LA VITA DELL’UOMO È UN FILO
CHE NON PUÒ VENIRE TAGLIATO.
ARTICUL 3: ogni individui al à dirit ae vite, ae libertât e ae sigurece de sô persone.
ARTICUL 7: ducj a son compagns devant de leç e a àn dirit, cence nissune discriminazion, a vê une tutele compagne di bande de leç.
Ecologjie e lûcs di aghe
Chest an nô fruts di tierce o vin lavorât su la ecologjie e sui rapuarts tra vivents, om e ambient fisic.
Si sin interessâts dai lûcs di aghe lâ che si svilupe la vite, come lis pocis, il stagn e i laguts.
O vin let la storie dal zardin di Monet in France e imagjinât come che al podedi sei fât il so lagut.
O vin studiât i ecuilibris che si crein tra plantis e animâi e fat il confront tra i fatôrs abiotics e biotics di un ecosisteme. O vin vût la fortune di esplorâ un lagut artificiâl tal zardin di une aziende agricule di Faedis: o vin cussì viodût ninfeis, crots, pessuts e alghis.
O vin ancje esplorât un zardin di plantis aromatichis e jerbis medisinâls e scuviarzût cualchi segret des plantis e dal lôr adatament tal ambient, parvie che odôrs e savôrs a vegnin fabricâts des plantis par difindisi dai animai che a vuelin mangjalis o par atirâ i insets impolinadôrs.
A scuele o vin zuiât a induvinâ i odôrs cjapats sù e ognun di nô al â costruît il paîs dai profums cun materiâi di ricicli e cjartutis coloradis. Si sin judâts è o vin lavorât insiemi imparânt a condividi i materiâi e lis ideis.
O vin implantât esperiments par comprendi i ecuilibris che si crein tra aghe e aiar e tra aghe e materiâi solits.
I esperiments nus coventavin par verificâ in ce maniere che lis nestris previsions sui fenomens a fossin justis o sbaliadis. Al jere di ridi cuant che o scuvierzevin cierts fenomens che a levin “denant-daûr” rispiet a lis nestris ipotesis!
La mestre nus faseve simpri viodi e provâ a turni ce che al sucedeve.
In chestis fotos nus viodês une vore impegnâts a misturâ, pesâ e provâ i nestris fenomenâi esperiments cu la aghe!
