Blog Archives

vuarzine
Ic Faedis, Scuola Primaria di Faedis,

Tant che oms de Preistorie!

no comment

Chest an nô fruts di tierce de scuele primarie di Faedis o vin imparât a costruî argagns, imprescj e ogjets dal om primitîf. Intai laboratoris di archeologjie nô fruts o sin deventâts protagoniscj e no scoltadôrs passîfs intal aprendi la Preistorie.
Tai laboratoris che a àn metut adun la lenghe furlane, la lenghe taliane e la lenghe inglese o vin imparât a coltivâ i cjamps, a costruî lis armis par lâ a cjace, a costruî une cove, a tiessi la lane, a realizâ vâs e struments musicâi, a impiâ il fûc.

Ve ca cualchidune des nestris ativitâts

AGRICULTURE (cliche)

CJACE

L’om primitîf par difindisi e par podê mangjâ, dal imprin al à imparât a cjaçâ.

Tal PALEOLITIC il clime al jere une vore crût (glaciazion) e lis plantis a jerin pluitost raris.

I oms, che no cjatavin pomis e lidrîs di mangjâ, si impegnavin tal lâ a cjace.

A cjaçavin soredut insiemi, par podê cjapâ e copâ animâi di grandis dimensions, tant che il mammut.

Tal NEOLITIC il clime al jere cambiât e al jere deventât plui clip.

La Tiere e tornà a jessi cuvierte di une vegjetazion fisse.

L’om al scuvierzè la agriculture e l’arlevament, che a rivoluzionarin il so mût di vivi.
Cun dut achel, al continuà a impegnâsi tal lâ a cjace, inventant gnovis armis plui adatis al ambient.

 

LA PITTURA RUPESTRE (cliche)

WEAVING TESSITURA (cliche)

20210518_154629 rid
Ic Faedis, Scuola Primaria di Faedis,

Esplorìn la Nature cui nestris sens

no comment

Ce isal di plui biel tal scuvierzi la Nature se no chel di esplorâle cun ducj i nestris sens?

Pai plui piçui de scuele primarie, i fruts di classe prime, la cognossince de nature e passe pes lôr manutis. 

Mans che a cjapin sù fueis, a cjarecin rosutis, a semenin semençutis di ravanei e lidric, a specolin panolis, a sborzin jerbe, a traplantin pomodoros e patatis, a ravanin te tiere a cirî viers, a sticin mariutinis e a scjampin se e passe cualchi âf.

Tal nestri ort e zardin de scuele primarie di Faedis al è pussibil provâ a tocjâ pardabon tantis maraveis de Mari Nature. Par no cjacarâ dai profums des plantis aromatichis, dal odôr de cevole e dal puâr, dai peteçs dai uceluts e dai colôrs sflandorôs di paveutis, rosis e fueis di dutis lis speciis.

Il cuore_page-0001
Ic Faedis, Scuelis Primariis,

Didatiche a Distance

no comment

Chest an di scuele, par vie de emergjence sanitarie dal Covid19 lis lezions in presince si son dibot fermadis ae fin dal mês di Fevrâr.

A son stadis metudis in vore diviersis modalitâts par rivâ a cjase di noaltris fruts cuntune didatiche a distance.

Tal nestri Istitût si à decidût di preparâ pes classis paralelis compits di realtât che nus vignivin mandâts ogni setemane.

In chescj compits e je stade simpri presinte ancje une propueste di lenghe furlane cun ativitâts interdissiplinârs, in forme di laboratori e une vore bielis. Nô si sin divertîts tant a davuelzi lis propuestis che i mestris nus devin… tantis voltis a jerin ancje i link par podê viodi filmâts o scoltâ musichis e storiis par furlan.

Ve ca cualchi compit che nus vevin dât e i nestris lavôrs.

CLASSE PRIME

CLASSE SECONDE 

CLASSE TIERCE

 

CLASSE CUINTE

Un biel lavôr fat a cjase!

Amîs di zûcs tal Grivò – conte in furlan

What do you want to do ?

New mail

castelli_medievali
Ic Faedis, Scuola Secondaria di primo grado di Faedis,

I nestris cjistiei

no comment

Noaltris di seconde e tierce A de Scuele Secondarie di prin grât di Faedis o vin realizât e ilustrât un librut su la storie dal Friûl. Chest biel lavôr nus à permetût di cognossi ancje la storie dai nestris cjistiei e des fameis dai Sofumbercs e dai Cucagne.

CJISTIEL DI SOFUMBERC: RESIDENCE DAL PATRIARCJE

Il Patriarcje, che la sô sede principâl e jere in principi Aquilee, in realtât al steve dispès a Cividât o a Udin. Il cjistiel di Sofumberc, non che al ven dal todesc e che al vûl dî «mont a spiç», al fo comprât come dimore dal Patriarcje pe bielece dal paisaç e pe vicinance a Cividât e a Udin. Il Patriarcje lu destinà come feut a une famee feudâl a lui fedêl che e cjapà il non di Sofumberc.

I SIÔRS DI FAEDIS

Une des fameis sioris plui impuartantis de epoche patriarcjâl a forin i siôrs di Faedis, che esercitarin la incarghe di «cjamerans» dal Patriarcje.
Za intal XI secul il Patriarcje Popone al concedè a un siôr de Carinzie, Odorico di Auspergh, il permès par fâ sù une tor-masti par controlâ e difindi il teritori di Faedis.

Il masti al fo costruît adalt, intun puest strategjic che al permeteve di controlâ dute la valade dal Grivò. Daspò il cjistiel si ingrandì cu la costruzion di une«domus» fortificade.

I nobii di Faedis tal 1142 a cjaparin il non di «Cucagne» dal furlan «cuc», val a dî çuc, culine. Jessint feudataris ministeriâi, cjamerans, a vevin l’impuartant compit di custodî i tesaurs de Glesie di Aquilee.

DSCN1420
Ic Faedis, Scuola Primaria di Faedis,

Tal bosc al è puest par ducj

no comment

Une storie che e fevele di amicizie e di pâs. A nô de classe prime di Faedis nus à plasût tant…

Une dì tal bosc si presente un sghirat…
– Mandi a ducj! Mi clami Pignûl! Ce biel che al è chest bosc!
Al salte fûr de sô tane il sghirat Pevar e al cjale il gnûf rivât.
– Ca no tu puedis stâ… O soi jo il sghirat e lis nolis a son mês!

 

Tal indoman Pevar al viôt che Pignûl al à za fate amicizie cun chei altris animâi
e al à cjatade une buse propite intun arbul li dongje. Pevar al è furiôs.
– Ca nol è puest par doi sghirats… jo o soi rivât prime di lui!
– No stâ rabiâti, Pevar, il bosc al è grant e a son nolis par ducj i doi! – i rispuint il cenglâr.

 

Alore Pevar, ofindût, si siere inte tane e al dîs: – Se le pensais cussì, alore o voi vie jo…
 La bolp e il riç a batin te sô puarte, lu clamin, ma lui nol rispuint e al prepare la valîs pensant: “Se a preferissin un scognossût, o larai vie jo.”
Propit in chel moment si sint un rumôr fuart: une scuadre di boscadôrs e je in vore a taiâ un arbul li dongje. Al è propit chêl de tane di Pignûl!!! L’arbul al cole jù intun sclop e il sghirat al reste cence la sô cjase.
Viodint il gnûf rivât cussì disperât, Pevar si decît e al va a clamâlu: – Sint, tu puedis vignî a stâ ca di me!
– Ma … alore no tu sês plui rabiât cun me…
– No, – i rispuint Pevar – o ai capît  che tu vevis reson:

TAL BOSC AL È PUEST PAR DUCJ!

joibe grasse 1511
Ic Faedis, Scuola Secondaria di primo grado di Faedis,

Storie ilustrade dal Friûl

no comment
La nestre regjon e je un teritori che al à vût une storie complicade (e dispès dolorose), ma di cheste nestre storie o vin cjatât pocjis informazions sui libris di scuele.
Cussì noaltris di 2^A de scuele secondarie di Faedis o vin pensât di meti adun il nestri libri ilustrât di storie dal Friûl.
Cu la vuide des professoris di storie e di art o vin realizât dissens e contât i events plui impuartants  scomençant de nassite dal Stât Patriarcjâl  fintremai al Ream di Italie.
Ve ca une cerce dal nestri libri…

NASSITE DAL STÂT PATRIARCJÂL

Indrì IV al tornà a vê il control dal Imperi in gracie dal Patriarcje di Aquilee che i veve permetût di passâ traviers dai siei teritoris.

Par mostrâ la sô ricognossince, il 3 di Avril  dal 1077 l’imperatôr Indrì IV al dè al Patriarcje Sigjeart la invistidure feudâl:

e je la nassite dal Stât Patriarcjâl.

 

 

Scansione
Ic Faedis, Scuola Primaria di Faedis,

Lant in biciclete

no comment

E je rivade la biele stagjon e noaltris di tierce o vin fat un percors di educazion stradâl in lenghe furlane che nus à puartâts… a PEDALÂ IN BICICLETE!

In cheste aventure nus à compagnâts “Tinute, la bicicletute”, un personaç che o vin inventât e che nus à fat ripassâ i segnâi verticâi e il semafar.

Cun Tinute o vin imparât tantis robis par cognossi miôr la biciclete, par savê ce vistîts doprâ, ce che al covente di vê su la bici e cemût compuartâsi par pedalâ in sigurece.

Par finî o vin metût in pratiche zirant in biciclete tal zardin de scuele!

 

 

 

ThumbJpeg.ashx
Ic Faedis, Scuola Primaria di Faedis,

Lezions di furlan

no comment

A scuele si studie il furlan!

Noaltris di cuarte lu vin studiât intun mût speciâl, parfin cjalant cu la LIM la trasmission MAMAN!
Al è un program televisîf divertent: la protagoniste Daria e à ogni dì cualchidun che al va a cjatâle, par esempli Dj Tubet  o Ciccio Pasticcio.

Tal ultin si viôt cualchi frut che al dîs alc par furlan. Noaltris no vin mai mandât un video, ma nol impuarte! Ancje cence di nô la trasmission “Maman” e va benon! Cjalaitle: e je propit biele e le conseìn a ducj.

Une altre robe che nus plâs a son i “Omenuts”, un carton animât che nus insegne a judâsi un cun chel altri.

“Omenûts sin nô, cun tancj biei siums
e ogni dì cirìn di metiju adun
omenuts insieme ducj i dîs
omenuts e o sarìn simpri amîs”

Ma a scuele no viodìn dome cartons! O lavorìn ancje sui cuaders operatîfs che a son di lei, di completâ e di piturâ!  

SAM_4073
Ic Faedis, Scuola Primaria di Faedis,

Un salt… te preistorie

no comment
Noaltris fruts des classis tiercis o vin imagjinât di fâ un salt indaûr tal timp… e o sin rivâts te PREISTORIE!!!
Il nestri viaç al è tacât fasint i archeolics, cuant che tal savalon dal zardin de scuele o vin cirût rescj antîcs…

Nus à plasût di studiâ la storie de evoluzion de Tiere: o vin fat tancj dissens e zuiât cu lis flash cards.

Finalmentri o sin rivâts ai DINOSAURS e li si sin divertîts a costruîju cu la cjarte di gjornâl…
un lavôr lunc, ma che nus à plasût une vore.

Cuant che o vin studiât i oms primitîfs, o vin ancje provât a sclesâ la piere
par fâ sù armis e imprescj par lavorâ la tiere. Ce fadie!

Par studiâ, nus à judât il librut in lenghe furlane “Preistorie in Friûl”, un cuader operatîf dal Consorzi Universitari dal Friûl.
Al è stât propit biel tornâ indaûr te storie in cheste maniere!