Nô fruts di tierce de scuele di Paulêt o vin lavorât tal nestri ort a scuele! O vin sperimentât e imparât insiemi.
Prime o vin semenât i cesarons in dôs casselis, lis vin metudis su la taule in aule.
O vin bagnât i cesarons ogni dì e spietât che a nassessin par traplantâju tal ort.
Ve ca lis fotografiis de nestre ativitât.
Po dopo al è stat tant biel lavorâ di fûr!
Soredut messedâ la tiere e bagnâ cul sborfadôr.
La fadie e je stade ben paiade: a son cressudis bielis plantis e i cesarons a son in rose!
Ce maravee! I cesarons a son pronts di cjapâ sù e sprecolâ.
A son pronts di cerçâ! Mmm … A son dolçuts! I nestris cesarons a son i plui bogns.
Intal percors di lenghe furlane noaltris fruts mezans e grancj de Infanzie di Grions o vin svilupade la storie “E nas une pavee”.
Cheste storie nus à à motivâts a realizâ un librut ilustrât e altris materiâi e zûcs: o vin fat sù il pipinot de ruie e la gjostrute cu lis imagjins dal cicli de vite de pavee. O vin memorizât tiermins specifics: ûf, cavalîr, galete, pavee e o savìn contâ la storie lant daûr des secuencis ilustradis.
E cumò cjalait e scoltait la biele storie de nassite de pavee. A son lis nestris vôs che us e contin!
“INTAL BOSC E JE UNE CJASE. DENTRI TE CJASE A SON TRÊ ORS. UN ORS GRANT, UN ORS MEZAN, UN ORS PIÇUL.”
I piçui e i mezans de scuele di Paulêt a àn imparât la storie di Riçotute in Furlan: e je deventade lôr amie e, cu lis imagjns, a san contâle.
Si son inzegnâts a fâ un libri par om, a realizâ une dramatizazion e – ae fin – a zujâ ae Tombule di Riçotute … si intint, dut par Furlan!!!
E cumò fracait ca sot e cjalait cheste presentazion dal librut fat dai fruts!
Chest an, nô fruts di cuinte de primarie di Paulêt, o vin svilupât in lenghe furlane un percors par cjapâsi cure des plantis dal ort, ativitât che e fâs part dal progjet “Io ho cura di te: regaliamoci un sorriso!”. Tal curtîl de nestre scuele al è stât posizionât un grant cûr circondât ator ator di casselis retangolârs par podê plantâ e semenâ dentri. Nô fruts di cuinte o vin semenât rucule, salate, ravanei, valeriane e plantât la salvie. Al è stât un lavôr impegnatîf che nus à dât une grande sodisfazion. Cjalant dut chel che al è ator di nô, o vin cjatât la ispirazion par scrivi bielis poesiis su la pâs.
IN VORE TAL ORT
Prin di dut o vin metût la tiere te cassele: sot, chê che si cjate tal nestri zardin, miscliçade cul ledan, e sore chê plui fofe.
Il moment plui biel al è stât cuant che o vin preparât il teren par semenâ. Ducj o vin metût lis mans te tiere e o vin doprât lis palutis e i ristiei par splanâ. Po o vin lassât polsâ la tiere par dôs setemanis.
Prime di semenâ o vin metût in bande un pôc dal tieriç parsore vie.
Dopo o vin semenât a man, sparniçânt lis semençutis.
Tal ultin o vin taponât lis semencis cu la tiere e bagnât cul sborfadôr.
Passadis lis setemanis e je nassude cualchi plantute.
INSIEMI O VIN PITURADE LA PÂS.
O vevin une scjate di colôrs lusints, vîfs, cjariâts. O vevin une scjate di colôrs cualchidun cjalt, altris frêts. O vevin l’aur e il zâl pal soreli e la lûs, pal calôr, l’afiet e la felicitât dai fruts. O vevin il celest pal cîl e la aghe dai flums che e côr vie cu la sô biele melodie. O vevin il blu pal mâr limpit e cuiet. O vevin il rose pai flôrs che a si pandin inte Vierte. O vevin il blanc pal ridi dai frutins. O vevin il vert pe nature e la jerbe tai prâts sflorîts des culinis, pes plantutis che a cressin tal ort. O vevin il ros pai cûrs, pal afiet dai parincj ducj riunîts. Si sin sentâts, o vin rimirât dut chel splendôr e o vin piturade la pâs.
O vevin une scjate di colôrs lusints, vîfs, cjariâts. O vevin une scjate di colôrs cualchidun cjalt, altris frêts. O vevin il celest pal cîl, l’aiar lizêr e il mâr a buinore, pai flôrs inte Vierte e la ploie che e fâs ben. O vevin il ros pai tulipans, lis rosis e l’afiet par ducj. O vevin il naranç pes fueis inte Sierade, pal tramont de sere, i gjirasoi tai cjamps e lis pomis d’Istât. O vevin il maron pai uciei, pai troncs dai arbui, pe tiere cu la semençute. O vevin il viole pe ue tai vignâi che disfame i oms di îr e di vuê. O vevin il zâl pal soreli che al scjalde i cûrs de int e al ilumine i voi dai fruts. O vevin il vert pe jerbe tai prâts e la nature che o viodìn in ogni zornade. Il vert al è ancje il colôr de trancuilitât. Si sin sentâts, o vin cjalât dut chel splendôr e o vin piturade la pâs.
Mandi a ducj i fruts e lis frutis che a imparin a cjacarâ par furlan!
Nô fruts de classe cuinte de scuele primarie Division Alpine Julie di Udin (1 Comprensif) cu la mestre Laura R. o vin pensât di inventâ lis peraulis di une cjançon par divertîsi cun gjonde cun ducj i fruts de nestre scuele tes zornadis plui cjaldis a la fin dal an.
Noaltris o considerìn cheste cjançon tant che il nestri INMI DE SCUELE.
Cussì o vin cjantât ancje une strofe in furlan e viodìn se us plâs ancje a voaltris!!!! Clicait ca sot par sintîle!
Nô fruts de seconde A de scuele Fruch di Udin chest an o vin imparât a cognossi i Sbilfs, lis Aganis e la bandiere dal Friûl.
Nus â plasût une vore imparâ i nons da lis emozions. O vin imparât ancje i numars fin al siet cu la cjançon “Un, doi, trê”
… Al è stât biel cuant che o vin plantât la blave e scuviêrt cemût che si faseve la polente une volte.
O vin ancje inventât storiis cui personaçs des liendis furlanis e si sin tant divertûts.
Ancje nô o podìn impegnâsi a rispietâ l’ambient che o vin dulintor… Nô fruts di seconde de scuele di Paulêt o vin riciclât materiâi e creât robis gnovis. Ve ca lis nestris ativitâts…
Ce lavôr straordenari trasformâ lis butiliis in tancj personaçs par fa il nestri presepi!
Noaltris o vin lavorât ducj insiemi: ogni frut al à realizât alc e po dopo o vin metût adun dutis lis parts par fâ i personaçs e il presepi.
La butilie di plastiche e je diventade un re magjo! Ce fortunade!!
Si puedin tacâ lis butiliis pal cuel e fâ une clessidre par misurâ il timp.
Cui stecs dal gjelât o vin fât tantis bielis stelis di picjâ sul arbul di Nadâl. Ce figuron!
Cui tapons di plastiche o vin fate une biele curnîs pal pipinot di nêf grant e grues. Ce biel cuadri!
Cu lis borsis di cjarte o vin fât mascarutis par divertîsi a Carnevâl.
Ce ligrie sperimentâ cualchi materiâl gnûf!
Cjalait! O sin nô fruts metûts ducj un dongje di chel altri par fâ insiemi un biel prât.
I bussui dal yogurt che o mangjìn a mirinde e son deventâts biei vasuts di campanelis.
Par decorâ i vasuts o vin fat un pocjis di rosutis di cjarte di tancj colôrs par tacâlis ator ator, o vin metût une curdelute e fat un biel floc.
O vin imparât a vê cure de nestre plantute … E je stade une biele esperience! Ce brâfs zardinîrs!!
Cun chest lavôr o volìn insegnâ a ducj che lis robis a contin simpri alc… no son di butâ vie… e soredut comunicâ a ducj la impuartance dal rispietâ e vê a cjâr la nestre Tiere…
Lis plantis a son intor di nô, nus dan ossigjen, di mangjâ, fen e granele pai nemâi. A coventin par vê la materie prime par fâ paste, pan, vueli, conservis, marmeladis, strucs di pomis, cjarte, len, medisinis e tantis altris robis che o doprin ogni dì.
Lis plantis a son nestris amiis, ma o vin scuvierzût che i arbui a son super amîs!
Nus fasin ombrene e fresc cuant che al è cjalt di Istât e nus tegnin cjalt cuant che al è frêt.
In primevere nus ispirin a sei artiscj cu lis lôr sfloriduris maraveosis e nus incjantin cu la musiche des lôr fueis e dai ucieluts.
Cuant che o zuìn nus dan ripâr par platâsi, bachetis magjichis e spadis par diventâ mâcs e cavalîrs.
Se o gjavìn la mascarine de muse, i arbui nus fasin sintî l’aiar net e profumât.
Savêso che i teis dal zardin de nestre scuele si lassin strenzi dai nestris braçuts e nus tegnin tante compagnie?
Chest an o vin esplorât il bosc, il zardin, il rocul e lis frazions di montagne dal nestri comun. Cussì o vin cognossût il noglâr, il cjariesâr, il cocolâr, il morâr, l’ulîf, l’orâr, il cjarpin neri e l’arbul di Gjude.
Par contâ il valôr des plantis o vin lavorât tal nestri ort de scuele, scusupât, semenât, costruît libruts, fat matematiche, dissegnât, piturât e scrit in ben trê lenghis: talian, inglês e furlan!
doprât lis palutis e i ristiei par splanâ. Po o vin lassât polsâ la tiere par dôs setemanis.
O vevin une scjate di colôrs
Si puedin tacâ lis butiliis pal cuel e fâ une clessidre par misurâ il timp.
Lis plantis a son intor di nô, nus dan ossigjen, di mangjâ, fen e granele pai nemâi. A coventin par vê la materie prime par fâ paste, pan, vueli, conservis, marmeladis, strucs di pomis, cjarte, len, medisinis e tantis altris robis che o doprin ogni dì.
